Siglir tar il cuntegn
Inhalt

Ulteriur Grischun Cuira - schluccar scumond d'alcohol

Cun 16:3 vuschs ha decidì il cussegl communal dad adattar la lescha da polizia da l’onn 2008. Quella aveva purtà a Cuira la reputaziun, d’avair la pli severa lescha da polizia da la Svizra.

Ina butteglia sin las vias da Cuira la notg.
Legenda: Temps main severs - cun 16:3 vuschs ha decidì il cussegl communal dad adattar la lescha da polizia da l’onn 2008. Keystone

Il grond tema da la seduta dal cussegl communal da Cuira era cler: La lescha da polizia. Quella ha dapi l'onn 2008 survegnì la reputaziun dad esser la pli severa lescha da polizia da la Svizra. Il punct dispitaivel era il scumond d’alcohol durant la notg. Da las 00:30 enfin las 07:00 èsi numnadamain scumandà a Cuira da baiver alcohol sin plazzas publicas. Cun quest scumond han ins vulì diminuir ils excess d’alcohol e randals en la citad.

Cuira na vul betg pli avair la pli severa lescha da polizia.

Uss ha il cussegl communal da Cuira decidì cun 16 a 3 vuschs ed 1 abstenziun da vulair adattar la lescha. Il cussegl da citad sto uss elavurar in'adattaziun e preschentar quella lura puspè al cussegl communal. Quai vegn ad esser il cas vers atun da quest onn. Alura ha la populaziun da Cuira da decider co i duai ir vinavant cun la lescha da polizia a Cuira.

Effect da la lescha actuala dispitaivla

Tgi che na sa tegna betg vid la lescha actuala sto far quint cun in chasti. La polizia chantunala discurra qua da bun 15 cas per onn. Quai malgrà che questa regla na vegn betg resguardada strictamain. La polizia serra numnadamain regularmain in ni l’auter egl per evitar discussiuns pli grondas.

Oliver Hohl
Legenda: Oliver Hohl, iniziant G.-M. Maissen
Tge porta quest chasti sche la polizia na chastiescha alura tuttina betg. Forsa era pervi ch'il chasti da 50 francs na fa mintgatant nagin senn.
Autur: Oliver Hohlcusseglier communal da Cuira
Mario Cortesi
Legenda: Mario Cortesi, adversari G.-M. Maissen
Era sch’ins n’è betg consequent cun dar chastis. Il scumond procura che pli paucs fan tuppadads.
Autur: Mario Cortesicusseglier communal da Cuira
Tom Leibundgut
Legenda: Tom Leibundgut, cusseglier da citad G.-M. Maissen
Nus avain fatg questa lescha avant 8 onns. Dentant era nus pudain daventar pli scorts.
Autur: Tom LeibundgutCusseglier da citad Cuira

Las trais vuschs cunter l'adattaziun èn vegnidas dals cussegliers communals Mario Cortesi, Urs Rettich ed Adrian J. Meier.

RR novitads 20:00