Siglir tar il cuntegn

Ulteriur Grischun Cuira Sid - stagnaziun da traffic suenter accident

Suenter ch’in camiun da latg è cupitgà recumonda la polizia da duvrar la sortida nord per ir en citad da Cuira.

camiun cupitgà
Legenda: Il camiun era vegnì da Domat e vuleva tenor indicaziuns da la polizia ir vers l'autostrada. RTR, P. Bundi
Legenda: Guardar il video «Mesemna mezdi a Cuira Sid». Durada 1:29 minutas.
Dals 18.05.2016.

La polizia da la citad da Cuira è vegnida avertida las 13:07. Tar il vehichel sa tracti dad in camiun da latg ch'era en viadi da Domat en direcziun da l'autostrada. Tar la gronda cruschada Sommerau è el sa cupitgà.

Il manischunz è vegnì purtà en l'ospidal per controlla. Tenor indicaziuns dad Ueli Caluori da la polizia da la citad haja il manischunz stuì vegnir deliberà or da ses vehichel, saja dentant mo blessà levamain.

La groma dal transporter cupitgà va sur via via.
Legenda: La groma dal transporter cupitgà va sur via vi. mad

Las forzas da salvament, la polizia e l'Uffizi per l'ambient èn stads al lieu d'accident. Tenor infurmaziuns dad Ueli Caluori stoppia l'uffizi adina vegnir activ, sche liquids sortan tar in accident. Qua saja dentant stà «per fortuna» mo da groma.

Vers las 18:00 era il lieu d'accident rumì ed il traffic ha puspè pudì cursar senza disturbis.

RR novitads 14:00/17:00