Siglir tar il cuntegn
Inhalt

Ulteriur Grischun Cuira: Tribunal federal abolescha permiss da construcziun

Il Cussegl da la citad da Cuira aveva dà il permiss da sanar ed engrondir il center da cumpra Wiesental, malgrà che impurtantas parts dal project n'eran anc betg definidas. Per quest motiv ha il Tribunal federal abolì il permiss da construcziun ed approvà dus recurs.

vista sin il center da cumpra dal Wiesental
Legenda: Il center da cumpra sto anc restar in temp en la furma actuala. RTR, Onna Riedi

Il fanadur 2016 ha il Cussegl da la citad da Cuira lubì la sanaziun e l'engrondiment dal center cun duas cundiziuns: Avant la construcziun stoppian vegnir preschentads ils plans per far in tetg sur la rampa da chargiar, ed il medem mument stoppia vegnir inoltrà in plan da conturn cun indicaziuns davart l'access e l'implantaziun.

Dus recurs da vischins

Il Tribunal federal ha approvà il recurs da dus vischins da la parcella. Quels avevan crititgà che las cundiziuns na cuntegnian betg manglaments dal project che fissan pussaivels da schliar senza pli gronds problems. L'access e l'implantaziun hajan dentant consequenzas essenzialas sin las emissiuns da canera, sin il dumber da parcadis, la grondezza da la surfatscha verda e la segirtad da traffic.

Ils derschaders sustegnan quest avis. Sin fundament da la muntada da las parts da project anc avertas n'avess il Cussegl da la citad betg dastgà giuditgar la dumonda da construcziun independentamain da quai. L'uschenumnà urden da coordinaziun pretendia ch'ina construcziun planisada stoppia vegnir examinada en ina procedura da permiss singula ed unifitgada.

Tenor ils derschaders federals ha la Dretgira administrativa dal Grischun agì e decidì a moda arbitrara cun confermar il permiss.

RR novitads 14:00