Surtut la mancanza da pernottaziuns haja chaschunà la perdita, hai num en la communicaziun da Cuira Turissem. L'onn passà aveva la citad cun passa 215'000 pernottaziuns anc nudà cifras da record. Ina gronda part da la perdita surpiglia la citad da Cuira, en rama d'ina sort garanzia da deficit.
En vista a la situaziun actuala ha la radunanza da delegads da Cuira Turissem approvà ina contribuziun da solidaritad unica per l'onn che vegn. Ins spetgia expensas supplementaras fin a 120'000 francs.
Nova testa al timun
La radunanza ha ultra da quai elegì unanimamain Vera Stiffler sco nova presidenta a partir dal 2021. Ella remplazza Rico Monsch ch'haja dapi il 2012 contribuì ina massa al svilup turistic da Cuira.
Vera Stiffler è dapi il 2012 en la suprastanza e portia tras ses engaschament en divers gremis cun sai blers contacts politics e savida fundada da marketing e dal traffic public.