Siglir tar il cuntegn

Header

audio
Mezdi: Il kino a Cuira po vegnir construì
Or da Actualitad dals 20.12.2019.
laschar ir. Durada: 02:02 minutas.
cuntegn

Cuira Via libra per kino a Cuira Vest

L'ultim recurs pendent d'ina singula persuna cunter il project dal kino grond sco er l'iniziativa «per ina viva citad veglia da Cuira e per mantegnair ils kinos en la citad» è retratgs.

Oriund eran els set possessurs da chasas da la «Raschärenstrasse» a Cuira Vest che èn sa dustads cunter il kino grond che duai vegnir construì. La finala ha anc ina dunna che viva en la Bassa cumbattì il project. Ella è la figlia dad ina dunna pli veglia che viva en la Raschärenstrasse a Cuira. Uss ha er quella dunna retratg ses recurs, quai perquai ch'ella è sa cunvegnida cun Thomas Domenig senior che vul construir il nov kino, uschia Romano Cahannes l'advocat da Thomas Domenig. Co quella cunvegna guarda or e sch'i è er fluì daners na leva el dentant betg tradir.

Retratg iniziativa

L'iniziativa «per ina viva citad veglia da Cuira e per mantegnair ils kinos en la citad» è vegnida retratga. Uschia ha il president dal Cussegl communal da Cuira, Marco Tscholl, infurmà gievgia suentermezdi il parlament. Lez ha prendì per enconuschientscha il fatg.

L'october aveva la Dretgira administrativa chantunala decis che parts da l'iniziativa na sajan betg valaivlas. Quai suenter ch'ils iniziants avevan tratg vinavant ina decisiun da la citad da Cuira. Concret aveva la citad refusà in artitgel supplementar en il text d'iniziativa ch'avess pussibilità da refusar dumondas da construcziun er retroactiv.

Il comité d'iniziativa aveva sinaquai decis da far nagin recurs cunter la decisiun ed ir senza quest artitgel supplementar en votaziun. Quella votaziun che fiss stada previs ils 9 da favrer è uss dentant giud maisa.

Tut tenor pon ins cuntinuar cun las lavurs il favrer

Cunquai che l'iniziativa è vegnida retratga ed er ils recurs èn giud maisa dovri uss mo pli la lubientscha da bajegiar. Quella ha il cussegl da la citad da Cuira da dar, probabel il schaner. Tenor Tom Leibundgut, il cusseglier da la citad responsabel, saja da quintar ch'i dettia er questa giada la lubientscha. Quella che la citad aveva gia dà era vegnida declerada sco nunvalaivla. Tom Leibundgut va perquai da quai or che las lavurs pon cumenzar, respectiv cuntinuar, en il decurs dal favrer.

RTR novitads 17:00+

Artitgels legids il pli savens

Scrollar a sanestra Scrollar a dretga