Sche la citad veglia sortir dal contract na possia ella betg stritgar andetgamain las prestaziuns e las garanzias.
Il favrer 2009 era la citad sa cunvegnida cun l'uniun da schlargiar la purschida, sanar las localitads e da pajar ina contribuziun da basa. Vitiers ha Cuira dauzà il tschains da locaziun.
Il december 2013 ha la citad lura visà il contract sin fundament d'ina decisiun dal cussegl da la citad sin la fin da december 2014. La cunvegna che la citad ha lura suttamess a l'uniun da la canorta preveseva mo pli il sustegn prescrit da la lescha e nagina garanzia da deficit sco era nagina contribuziun da basa.
L'uniun da la canorta ha lura fatg recurs tar la Dretgira administrativa dal chantun e quai cun success. Ils derschaders a Losanna han uss confermà la decisiun da la dretgira adminstrativa. Tenor els haja la citad visà il contract memia andetg. Ina visada dal contract haja da succedir a moda pli pauc 'drastica'. Las prestaziuns e garanzias sajan da scursanir successivamain sur in temp definì.
RR novitads 12:00