Siglir tar il cuntegn
Inhalt

Ulteriur Grischun Cumbatter il mobing en las scolas da Cuira

Il parlament da giuventetgna da Cuira è s'occupà cun la situaziun da mobing en las scolas da la citad – e cunter quella pudess vegnir fatg dapli.

Per ina giada sesan giuvnas e giuvens dal parlament da giuventetgna da la Citad da Cuira en la sala da parlamentaris.
Legenda: La sala da parlamentaris en la chasa-cumin da Cuira: Per ina giada sesan qua las giuvnas ed ils giuvens dal parlament da giuventetgna. RTR, Sabrina Bundi

Er en las scolas da Cuira dettia quai mobing – saja quai vilentar ubain mulestar verbalmain enfin tar violenza corporala.

Mobing è simplamain «scheisse»

«Per exempel vegnan ins vilentads sch'ins n'ha betg ils pli novs chalzers ubain la pli nova giacca», di ina giuvna ch'è sa participada al parlament da giuventetgna da Cuira. Er ella è gia stada confruntada cun mobing, e quai saja simplamain stà «scheisse».

Problem cumenza gia en scola primara

Quai che las giuvnas ed ils giuvens dal parlament da giuventetgna da Cuira han er crititgà: Mobing entschaivia gia en la scola primara. Magari na sajan ils scolasts betg sensibilisads avunda per differenziar tranter mobing e tranter simplas lumparias.

Formulà ina dumonda a la citad

Per megliurar la situaziun ha il parlament da giuventetgna formulà suenter sia sessiun ina dumonda a la citad da Cuira. Las giuvnas ed ils giuvens vulan savair, co ch'il cussegl da la citad valitescha la situaziun da mobing en las scolas e tge pussaivladads ch'el vesa per megliurar la situaziun.

En la proxima sessiun duai la resposta da la citad servir sco basa per formular ina petiziun.

RR actualitad 07:10