Victur da la cursa è il president dal cussegl naziunal, Jürg Stahl da la PPS. Gia ils dus onns vargai ha el gudagnà la cursa en furma d'in slalom gigant. Tar las dunnas ha gudagnà Andrea Gmür-Schönenberger da la PCD. 16 cussegliers e cusseglieras – oravant tut da partidas burgaisas – han quest onn fatg part da l'emna da skis. Dudesch parlamentaris e parlamentarias eran da la Gronda Britannia.
Brexit e migraziun sco temas
Sper l'ir cun skis serva l'emna da skis dentant er sco plattafurma bilaterala, che duai promover il barat politic. Baterlà vegnia in pau sur da tut, declera l'ambassadur svizzer da Londra, Dominik Furgler.
Sper la politica saja quai era la famiglia u hobis. Tema principal en ils discurs dals politichers era quest onn cleramain il Brexit. Ils Englais vulevan oravant tut savair, co la Svizra s'organiseschia senza esser commembra da l'uniun europeica, declera la cussegliera naziunala da la PLD, Christa Markwalder. «I dat tschertas differenzas e tschertas parallelas. Dentant san ins adina emprender in da l'auter.»
In auter tema dals discurs era l'immigraziun. «Ils parlamentaris englais han er s'interessà co ils Svizzers han realisà l'iniziativa da l'immigraziun da massa.» uschia cusseglier naziunal da la PBD, Duri Campell.
RR actualitad 07:00