Siglir tar il cuntegn

Header

video
La brigada d'infantaria da muntogna 12 na datti bainbaud betg pli
Or da Telesguard dals 17.11.2017.
laschar ir. Durada: 2 minutas 13 Secundas.
cuntegn

Ulteriur Grischun Dà giu la standarta l'ultima giada

Cun la nova refurma da l'armada (Svilup da l'armada) vegn la brigada d'infantaria da muntogna 12 schliada. Venderdi è stà l'ultim rapport. Ils battagliuns da la brigada vegnan integrads en autras furmaziuns da l'armada.

L'istorgia da las truppas da muntogna è lunga. Manevers e cumbats militars en las muntognas hai gia dà en il temp medieval (Chalavaina, Guerra da 30 onns euv.). Propi l'emprima truppa uffiziala da muntogna da l'armada Svizra è vegnida fundada l'onn 1892. La raschun per quest pass eran tranter auter ils pajas vischins che han fundà atgnas truppas specificas da muntogna enturn quest temp.

audio
Saira: Ultim rapport da la brigada d'infantaria da muntogna 12
ord Actualitad dals 17.11.2017.
laschar ir. Durada: 2 minutas 12 Secundas.

Durant il temp da l'Emprima Guerra mundiala existivan quatter brigadas cun en tut 21 battagliuns. Bunamain 16'000 schuldads eran schuldads da muntogna. Sco meds da transport per skis, armas ed auter materia servivan cunzunt chavals.

Las truppas da muntogna èn lura vegnidas engrondidas cuntinuadamain. Quai cunzunt durant la Segunda Guerra mundiala, ma era suenter, numnadamain fin ils 1960/70 – Novas armas, vehichels e scolaziun da cumbat en las muntognas.

Proteger, defender e gidar

Ils pensums principals da las truppas da muntogna èn sper la defensiun dal territori era stads: proteger ils cunfins sco er indrizs impurtants (sco p. ex. ovras electricas u il provediment d'aua) ubain er proteger occurenzas spezialas (sco p. ex. il forum economic mundial a Tavau). Plinavant tutga er il sustegn da polizia, pumpiers e sanitad en cas da catastrofas tar lur pensums.

Refurmas e reducziun

Cun la refurma «Armada 95» èn las truppas da muntogna per l'emprima giada vegnidas reducidas, quai per bun in terz. Cun la refurma «Armada 21» è il dumber da schuldada vegnì reducì da 360'000 sin 120'000.

En il rom da la refurma «Armada 21» è er la «Brigada d'infantaria da muntogna 12» vegnida fundada l'onn 2003. Ella è la brigada da reserva. Daspera datti dapi il 2002 anc las «brigadas activas 9 e 10». La partiziun dals spezialists da muntogna ad Andermatt cumplettescha las truppas da muntogna actualas da l'armada svizra.

Cun la surdada da la standarta, ils 17 da november 2017, è la furmaziun da tradiziun grischuna, la «brigada d'infantaria da muntogna 12», definitivamain istorgia. Cuira resta però il lieu da commando. A partir dal schaner 2018 vegn la «brigada mecanisada 11» ad esser staziunada a Cuira. Las midadas èn ina consequenza dal Svilup da l'armada, instradà ils ultims onns.

RR actualitad 17:00

Artitgels legids il pli savens