Siglir tar il cuntegn

Ulteriur Grischun Damain paja per cussegliers da Cuira

La Partida populara svizra da la citad da Cuira pretenda pajas pli bassas per ils cussegliers da la citad, 200’000 francs tanschian.

Lampa avant la chasa municipala cun l’inscripziun “Rathaus”.
Legenda: La PPS Cuira lantscha in’iniziativa per restrenscher pajas da cussegliers da la citad. RTR

La partida ha perquai lantschà ina iniziativa cun il titel «200’000 francs paja l'onn èn avunda», quai è da leger en il Fegl uffizial da la citad da Cuira.

Reducir paja per 50’000 francs

A partir dal 2017 duain las pajas dals cussegliers uschia vegnir reducidas per 50’000 francs. La paja dal president da la citad duai plinavant vegnir sminuida per 30’000 sin 230’000 francs l'onn.

Rimnar suttascripziuns

Enfin l'avrigl vul la partida avair ensemen las 800 suttascripziuns necessarias ed inoltrar quellas, uschia che la nova lescha pudess ir en vigur l’entschatta da l’onn 2017.