Siglir tar il cuntegn

Header

Ils Chinais cumpran gugent souvenirs.
Legenda: Ils Chinais cumpran gugent souvenirs. Keystone
cuntegn

Dapli Chinais visitan Cuira 你们好 中国人 – Nǐmenhǎo Zhōngguórén

«Hallo Chinais» – Adina dapli Chinais visitan la citad da Cuira. La fiera chinaisa è ina fiera cun bler potenzial uschia che Cuira Turissem vul carmalar anc daplirs.

Il 2005 ha Cuira gì 776 pernottaziuns da giasts da la China. L'onn passà eri bunamain tschintg giadas uschè bler, numnadamain 3'777. Il dumber crescha ad in crescher. Fin uss na sajan ils Chinais dentant ina nischa, quai di Leonie Liesch, directura da Cuira Turissem. Ed els vegnian er ils proxims onns a restar ina fatschenta da nischa. Tuttina vul Cuira carmalar dapli chinais, il potenzial è numnadamain enorm, la finala datti radund 1,4 milliardas Chinais.

Cuira vul giasts individuals

Leonie Liesch na vul dentant betg che Cuira daventa in segund Lucerna. Quai gnanc giess tenor ella cunquai ch'ils hotels n'han betg las capacitads per gruppas. Perquai sa concentrescha Cuira Turissem sin giasts individuals, pia betg sin gruppas. Ils giasts individuals sappian savens er Englais ed i saja pli simpel da communitgar cun els. Er hajan els dapli chapientscha per nossa cultura e pon er s'adattar meglier, uschia Leonie Liesch.

Ils Chinais cumpran gugent uras u auters souvenirs uschia ch'er la butias pon profitar da dapli Chinais a Cuira.
Autur: Leonie LieschDirectura Cuira Turissem

Ils giasts da la China giaudian cunzunt da pudair guardar la citad veglia da Cuira, viadis cun la Viafier retica e la pussaivladad dad ir siador en ils culms cun pendicularas, sco per exempel sin il culm da chasa da Cuira Brambrüesch.

Els cumpran cunzunt uras

Ils Chinais che visitan Cuira na procuran pia per dapli pernottaziuns a Cuira. Dentant er las stizuns pon, en scadin cas per part, sa legrar. Cunzunt vendiders da souvenirs ni uras pon profitar. Uschia è Marco Zoppi, che maina ina bischutaria che venda er uras, fitg cuntent cun ils Chinais. Els vulan cunzunt cumprar uras svizras. Per part hajan els entiras glistas cun empustaziuns dad amis e parents, uschia ch'in ni l'auter cumpra per plirs tschients u schizunt millis francs. Auter tuna quai tar Regula Carigiet che maina ina bischutaria cunzunt cun cliniez.

Tar mai na laschan els nagins raps. Sch'els cumpran insatge lura mo insatge bunmartgà. Il pli char ch'jau hai vendì l'onn passà ad in Chinais è stà insatge per circa 150 francs.
Autur: Regula Carigietmanadra da bischutaria

Cun dumandar enturn tar las butias en la Via da la posta a Cuira vegn spert cler. Ils Chinais cumpran uras u souvenirs sco magnets ni er cartas postalas. Cler ch'i dettia er da quels che cumpran ina giada in anè u ina chadaina, la regla n'è quai dentant betg.

RR actualitad 07:00