Siglir tar il cuntegn

Ulteriur Grischun Dapli svieuta per gruppa EMS l'emprim mez onn

La gruppa EMS ha augmentà la svieuta l'emprim mez onn per passa 12% sin 1,2 milliardas francs. Sco quai ch'il concern da chemia speziala communitgescha, haja el registrà en tuttas regiuns mundialas in creschament.

Legende: Video Martullo Blocher avant las medias abspielen. Laufzeit 0:48 Minuten.
Or da sil punct dals 13.07.2018.

Spezialmain positiv saja sa sviluppada la fatschenta en l'Europa. Stretgas da provediment chaschunian dentant ch'ils pretschs per materia prima s'augmentian vinavant. Dal schaner fin il zercladur 2018 è il Cash flow creschì sin 339 milliuns francs, in plus da 11% cumpareglià cun la medema perioda da l'onn passà.

Il recept da success

Per avair success saja quai impurtant da patratgar ordavant, mirar da daventar anc meglier e tschertgar bunas ideas, di la scheffa Magdalena Martullo. Uschia restia la clientella intgantada e veglia far fatschenta vinavant cun la EMS.

Innovaziun tar products e tar la EMS

In product che procura per furora è in sez d'auto che n'ha betg endadens ina massa fier cun 50 parts cumplitgadas, mabain in skelet da plastic da mo duas parts. Quai saja in grond success en l'industria d'autos. Quai sez è pli simpel da bajegiar ensemen e paisa 26 kilos pli pauc ch’in ordinari.

Era tier la EMS sezza datti innovaziuns per daventar pli effizient. Uschia è vegnì cumprà maschina che taglia satgs da plastic, enstagl da cumprar ils satgs. Las investiziuns da 200'000 francs sajan gia vegnidas amortisadas suenter in mez onn. 470 ulteriuras mesiras d'effizienza duajan suandar.

Nagina tema dals dazis da Trump

L'uiara da dazis tranter ils Stadis Unids da l'America e la China n'haja nagin effect sin la EMS, di Martullo. L'EMS furneschia ses products davent da la Svizra, e betg dals Stadis Uni en la China u il cuntrari. Quai saja schizunt ina schanza per els da survegnir lavur enstagl da concurrents americans.

RR novitads 07:00++