Ins vegnia ussa a seser ensemen e lura decider co vinavant. Quai ha l'advocat da la societad da construcziun City West, Romano Cahannes ditg envers il schurnal regiunal da SRF. La sentenzia dals derschaders da Losanna pudess bittar enavos l'entir project per plirs onns.
Il punct decisiv en la sentenzia è stà il rapport davart las consequenzas per l'ambient. Quel na correspunda betg a las prescripziuns. Il rapport existent tracta il kino, dentant betg l'entir areal cun il center da cumpra City West gist daspera. Tenor il Tribunal federal stuess il rapport d'ambient dentant resguardar omadus bajetgs sco unitad.
Cumenzar tar nulla
Per il nov kino e Thomas Domenig senior sco patrun munta quai uss: anc ina giada cumenzar da nov. El dovra ina nova lubientscha per bajegiar cun in rapport d'ambient cumplettà.
Entras la nova dimensiun da l'entir project cun il rapport d'ambient cumplettà, dastgan quella giada er las organisaziuns d'ambient far recurs.
Preistorgia dal cumplex da kino
- December 2016: Societad da construcziun City West inoltrescha la dumonda per construir.
- Schaner 2017: Sis vischins fan recurs cunter quella dumonda.
- Zercladur 2017: La citad da Cuira dat il permiss per construir, ils recurs dals vischins na lascha la citad betg valair. Ils vischins tiran vinavant lur recurs davant Dretgira administrativa.
- Avrigl 2018: Dretgira administrativa approvescha per part il recurs. Il Kino sto metter a disposiziun pliras plazzas da parcar als vischins.
- Zercladur 2018: Vischins tiran vinavant la decisiun davant Tribunal Federal.
Vischins n'èn betg ils sulets che vulan franar il kino
L'iniziativa «Per ina citad veglia viva – iniziativa per mantegnair ils kinos da la citad da Cuira» ha medemamain la finamira dad evitar ch'il nov center da kino vegn bajegià. Davos quella stat in comité che vul mantegnair ils kinos existents (Apollo e Kinocenter) en la citad da Cuira.
Scumond da bajegiar kinos en la zona a Cuira vest
L'iniziativa pretenda ch'i vegnia scumandà da bajegiar kinos en la zona a Cuira vest nua ch'il nov center da kino è planisà. Quest scumond duess sch'i va tenor il iniziants era valair retroactiv. Vul dir: Era sche Thomas Domenig senior survegn la lubientscha da bajegiar avant che l'iniziativa giess en vigur, fiss il nov kino scumandà – uschia la finamira dals iniziants.
Il parlament da Cuira aveva declerà quella iniziativa sco per part nunvalaivla (la part cun il scumond retroactiv). Cunter quella decisiun ha il comité fatg recurs davant Dretgira administrativa. Il termin da votaziun è perquai vegnì spustà dal matg sin ils 24 da november. Il recurs è anc pendent ed ins saja londervi d'elavurar la decisiun, ha la dretgira confermà sin dumonda.
RR novitads 12:00
