Accumpagnar ses um è il mintgadi d' Annemarie Fust da Domat. Curt suenter la nozza d'aur è la vita da Georg e sia dunna Annemarie Fust sa midada d'in mument sin l'auter. In culp dal tscharvè ha tuc avant trais onns l'um d' 83 onns che viva a Domat.
D'in mument sin l'auter è tut auter
Suenter in temp en spital ed en ina clinica da reabilitaziun è Georg Fust sa revegnì pulit bain, ma il mintga di resta ina sfida. Differents trenaments e bleras terapias emplainan il mintgadi. D'in mument sin l'auter è la vita da Georg Fust, ch' era sur decennis schef en la fabrica a Domat, sa midada.
Betg mo sia vita, era la vita da sia dunna Annemarie Fust n'è betg pli quai ch'ella era. Da tuttas uras mira ella da ses um, va cun el tar il medi e tar terapias.
I fa bain d'avair insatgi che chapescha mia situaziun. Che taidla tiers e che po gidar. Era sch'igl è mo duas uras, alura hai jau temp per mai, quai stim jau fitg.
La Pro Senectute porscha sustegn
Duas uras l'emna survegn il pèr visitas da Maya Weber da la Pro Senectute. Ella va a spass cun Georg Fust, prelegia cudeschs u discutescha sur da quai che curra e passa. Quellas duas uras èn in ferm sustegn per Annemarie Fust. Suenter la visita prenda l'accumpagnadra adina era peda per ella.
Il pèr prenda di per di sco el vegn e na fa nagins plans. Els speran, ch'els possian anc ditg viver en lur agen da chasa. La vita porschia adina puspè surpraisas, e quellas sajan da prender co i vegnian.
RR telesguard 17:40