D'in auto suenter l’auter s’illuminescha il sbrinzlader a sanestra per passar sper il Coop vi giu en la Gassa Sutò. Pertge pli tard è la via principala serrada. Ina giada en la la via da la Gassà Sutò, cuntinuescha il viadi per guntgir il plazzal tar la baselgia u fin a la staziun dal tren u gia suenter in per meters a dretg ora tar la Via Baselgia.
Per quella ruta èsi dentant per l’ina d’avantatg d’avair in bun egl per la mesira dals autos damai ch’igl è per part stretg. E per l’autra in maun versà cun il sbrinzlader, perquai che quella ruta maina ziczac tras il quartier enturn la baselgia fin tar la via principala.
Da tschel maun dal plazzal è il maletg sumegliant cura che autos e töfs ston guntgir il plazzal tras las vias lateralas dals quartiers – simplamain spievlà.
Ponderar tge via prender
Cunquai ch’il traffic tras las vias lateralas saja s’augmentà ils ultims dis, stoppian ins ussa era dar pli fitg adatg cura ch’ins saja da viadi tras ils quartiers, manegian pliras dunnas pli passadas. Ina ch’è gist stada a cumprar sa legra perquai gia ussa sin Nadal, pertge la davosa etappa da la sanaziun da la via principala tras Domat duess esser a fin il december.
Ch’il traffic en ils quartiers è s’augmentà dapi il glindesdi passà cura che la via principala tras Domat è vegnida serrada, quai sentan ils avdants – er quels che stattan in zic pli lunsch davent. Cunzunt la bun’ura audia ella dapli autos, constatescha ina passanta. Il mument na disturbia quai dentant betg ella, cunquai ch’ella sappia gea che quella canera haja era ina fin. In zic pli cumplitgà saja quai ussa dentant dad ir cun auto, pertge ins stoppia gia ordavant ponderar, tge via che saja il pli prudent da prender per vegnir al lieu.
Autos cun numers da l’exteriur
Malgrà ch’il traffic da transit duess vegnir svià sin l’autostrada A13 durant il temp che la via vegn sanada, charreschan quest suentermezdi che RTR è stà a Domat adina puspè era vehichels cun numers betg grischuns tras las vias da quartier enturn il plazzal – er numers da l’exteriur sco per exempel dal Portugal, da la Germania u da la Frantscha.
Reclamaziuns n’haja quai en mintga cas fin ussa dà naginas conferma la polizia chantunala dal Grischun. Cura ch’i dettia dentant dapli traffic e l’autostrada A13 saja surchargiada, vegnia la polizia era ad esser activa tar las rundellas da la Ems-Chemie e da Favugn per trametter enavos il traffic da transit che vul ir sur Domat.
RR actualitad 07:00