Siglir tar il cuntegn

Header

video
Vischnancas ston far in’analisa da ristgas – Domat ha gia fatg quella
Or da Telesguard dals 23.11.2015.
laschar ir. Durada: 2 minutas 57 Secundas.
cuntegn

Ulteriur Grischun Domat ha analisà las ristgas

L'emprim da schaner 2016 va en vigur la lescha per la protecziun da la populaziun. En questa vegn pretendì che las vischnancas analiseschan lur situaziun pertutgant privels. La vischnanca da Domat ha gia fatg quest'analisa sco vischnanca da pilot. Er las emprimas mesiras èn gia realisadas.

Maletgs da Pradella a Scuol han mussà dacurt tge forza che la natira ha ed er maletgs da colonnas da fugitivs èn omnipreschents. Tenor la nova lescha davart la protecziun da la populaziun èsi l'incumbensa da las vischnancas d'identifitgar a temp las ristgas e da prender mesiras. Las vischnancas èn obligadas d'analisar las periclitaziuns relevantas potenzialas che resultan sin lur territori tras la natira, tras la tecnica e tras la societad.

audio
Saira: Domat ha gia fatg l’analisa da ristgas
ord Actualitad dals 23.11.2015.
laschar ir. Durada: 3 minutas 8 Secundas.

Dischlocà ils servers en chasa communala

Domat ha fatg l'analisa u il check da ristga sco vischnanca da pilot. Tenor la presidenta communala Beatrice Baselgia, haja er dà surpraisas cun far l'analisa. Uschia n'avessan els mai quintà ch'ils servers (per l'entira IT communala) fissan periclitads. Quests servers eran tuts en il tschaler da la chasa communala. Cunquai ch'il privel d'inundaziun è dentant avant maun ha la vischnanca decidì da dischlocar quests servers. Quai saja sulet in exempel, nua ch'il check haja gia purtà effects, ha ditg Beatrice Baselgia.

Sper Domat han er gia fatg (u vid far) l'analisa da ristgas las vischnancas da Favugn, Flem, Mustér, Trimmis e Poschiavo. Il chantun spetga che tut las vischnancas grischunas analiseschan entaifer ils proxims 5 onns las ristgas e surdattan il rapport. Mintga diesch onns saja quest rapport d'actualisar, ha ditg il cusseglier guvernativ Christian Rathgeb, avant las medias.

Artitgels legids il pli savens