Bun in'emna suenter la dumengia da votaziuns ed elecziuns è Valérie Favre Accola sa decidida da betg candidar en il segund scrutini per il post da landamma a Tavau. Quai scriva la Partida populara da Tavau en ina communicaziun. Ensemen cun la suprastanza da la partida sajan els vegnids a la conclusiun ch'i saja impurtant che la batgetta da la vischnanca restia vinavant en mauns burgais. Cun desister da la candidatura uneschian la PLD e la PPS uschia lur forzas e las schanzas per il candidat liberaldemocratic Peter Engler, scriva la PPS Tavau vinavant.
Valérie Favre Accola cuntinuescha ses engaschi politic sco deputada dal Cussegl grond ed en la cumissiun chantunala da cultura ed educaziun.
Wilhelm ubain Engler
Uschia restan en la cursa per il presidi Peter Engler da la PLD ed il socialdemocrat Philipp Wilhelm. Lez aveva fatg en l'emprim scrutini il meglier resultat, suandà da Peter Engler e sin plaz trais Valérie Favre Accola. Christian Stricker (senza partida) era sa retratg gia la dumengia da votaziun, cunquai ch'el aveva fatg il mender resultat.
