La regenza («Kleiner Landrat»)
La regenza da Tavau consista or dal Landamma e quatter ulteriurs commembers. Quels vegnan elegids separadamain in da l'auter.
Tschintg candidats per quatter sezs
| Stefan Walser | PS | en uffizi |
| Simi Valär | PLD | en uffizi |
| Iris Hoffmann-Stiffler | Senza partida | nov, per il mument en il parlament |
| Jürg Zürcher | PLD | nov |
| Thomas Gerster | Senza partida | nov |
Valérie Favre Accola e Christian Stricker, ch'èn actualmain anc en uffizi, na candideschan betg pli. Els vulan daventar Landamma da la citad. Atgnamain fissi pussaivel da candidar per omadus posts. A Tavau na fa quai dentant nagin dals candidats. Quai na vesia la glieud betg gugent, manegian els.
Il parlament («Grosser Landrat»)
Il parlament sa cumpona da 17 persunas. Da las 17 persunas actualas candideschan dentant mo tschintg per in'ulteriura perioda d'uffizi. Trais dals deputads actuals candideschan per auters posts. Vinavant èn intgins deputads gia dapi trais periodas da legislatura en uffizi. Pli ditg na dastgan els tenor lescha betg star.
24 persunas candideschan per in sez en il parlament da Tavau.
Il Cussegl da scola
Il cussegl da scola è la direcziun strategica da las scolas communalas. El consista or da tschintg commembers: ina persuna ord la regenza e quatter persunas elegidas separadamain.
Candidats per il cussegl da scola
| Rebekka Gadmer | PPS | en uffizi |
| Martina Schmid Christoffel | senza partida | en uffizi |
| Gian Claudio Casty | PLD | nov |
| Christoph Geissler | PS | nov |
| Urs Gredig | PLD | nov |