cuntegn
Elecziuns Cuira
-
Anita Mazzetta vul ir en il cussegl da la citad
Anita Mazzetta da la glista libra verda candidescha per la regenza da Cuira. La Rumantscha da 56 onns, oriunda da Trun, vul succeder a ses collega da partida Tom Leibundgut che na candidescha betg pli per la regenza.
Anita Mazzetta da la glista libra verda vul ir en il cussegl da la citad da Cuira. Ella vul succeder a ses collega da partida Tom Leibundgut, ch'ha annunzià l'emna passada ch'el na candideschia betg pli. La Rumantscha è fitg motivada da surprender responsabladad.
Anita Mazzetta
Avrir la box
Serrar la box
Anita Mazzetta ha 56 onns, è oriunda da Trun e maina dapi prest 20 onns la secziun grischuna dal WWF. Ella è stada durant 10 onns, fin il december passà, en il parlament da Cuira. Sper quai ha ella er candidà l'onn passà per il Cussegl naziunal.
Per ella saja ussa il dretg mument, cunquai ch'ella haja pudì rimnar ils davos onns blera experientscha politica.
Saja quai en il parlament dalla citad da Cuira, nua ch'ella ha politisà durant 10 onns, sco er tar las elecziuns naziunalas da l'onn passà, nua ch'ella aveva candidà per il cussegl naziunal:
Per mai è la dumonda da forsa ina giada candidar adina stada preschenta. Dentant la constellaziun ha mai constà, uss constat ella e quella schanza vi jau prender.
Cunquai che ses collega da partida Tom Leibundgut haja gia infurmà ella ordavant, haja ella gì peda avunda per ponderar sch'ella veglia propi candidar. Ella cuntinuass segiramain cun la politica da ses antecessur.
Cler ch'ils temas ambient e protecziun da l'ambient vegnian ad esser impurtants per ella. Dentant punctuescha Anita Mazzetta er ch'ella saja adina stada e saja er en il futur averta per cumpromiss.
Sustegn da la PS
La partida socialdemocratica da Cuira ha communitgà ch'ella beneventia la candidatura da Mazzetta. Cun sia experientscha e sia savida politica cumpletassia ella bain ils cussegliers da citad Urs Marti e Patrik Degiacomi, scriva la PS. La partida ha già la fin da november nominà Degiacomi per in'ulteriura perioda d'uffizi.
Las elecziuns a Cuira èn ils 17 da matg.
Las schanzas dad Anita Mazzetta – ina valitaziun
Avrir la box
Serrar la box
«Ina surpraisa n'èsi betg ch'Anita Mazzetta candidescha per la regenza da Cuira. Suenter sia davosa sesida dal parlament da Cuira ha la politicra gì ditg che sia carriera politica na saja anc betg a fin – dapli na vuleva ella quella giada dentant anc betg tradir.
Uss è cler: ella saveva gia lura che ses collega da partida Tom Leibundgut na candideschia betg pli per in'ulteriura perioda. Anita Mazzetta è stada ils davos onns adina ina da las top-candidatas per il parlament ed ha savì recaltgar bleras vuschs. Perquai n'èsi nagina surpraisa che la partida surdat ad ella il pensum da tegnair il sez.
La gronda dumonda è uss dentant, cun tge candidats che las autras partidas – la PPS, la PCD e la PBD – vegnan. Sch'ellas vegnan cun candidats da renum, ch'ins enconuscha a Cuira, u sch'i vegnan plitost cun no-names. Avant che quai n'è betg cler, èsi grev da far ina prognosa davart las schanzas d'Anita Mazzetta.
E la finala decida il suveran, uschia ch'i po er dar ina surpraisa ils 17 da matg.»
Prisca Bundi, redacziun Cuira
RTR novitads 11:30++
