Siglir tar il cuntegn

Ulteriur Grischun «Empè da tugnar trasora, empruvar da far insatge encunter»

Ursin Widmer, il figl da la Cussegliera federala Eveline Widmer-Schlumpf vul vegnir pli activs en la politica e candidescha per la suprastanza da Favugn. El ha bunas schanzas cunquai ch’el è il sulet dals 4 novs candidats ch’è propi anc oriund da Favugn.

Ursin Widmer
Legenda: Ursin Widmer, il figl da la cussegliera federala vul s'engaschar politicamain. RTR, G.Caviezel

Quai saja era stà ina da las raschuns principalas, daco ch’el saja insumma sa decidì da candidar per in sez en suprastanza. «Nus avain vis la glista cun ils 4 candidats ed avain constatà che nagin dad els è propi da Favugn», di Ursin Widmer (26) ch’è sper scolast da musica era anc dirigent, chantadur e musicist. «Quai na munta betg ch’els na vegnissan betg da far bain la lavur sco suprastant, anzi jau crai ch’els fissan tuts quatter adattads.» E tuttina, el saja creschì si a Favugn, vivia era ussa qua e saja en sasez integrà fitg en la vita quotidiana da Favugn.

Mamma n’ha betg influenzà

Sia mamma n’haja en mintga cas betg ditg ad el da candidar. Ella haja bain manegià che quai fissi insatge per el, dentant betg dapli. Dentant cunquai che ses bab è stà plirs onns en la suprastanza da Favugn, ha el survegnì ina buna impressiun co quai è d’esser en suprastanza ed è lasuenter stà ton pli motivà da candidar.

Malcuntent cun ils resultats

La raschun principala daco ch’el è sa decidì da vegnir pli activs en la politica, haja dentant da far cun las votaziuns ed elecziuns. “Jau sun bleras giadas betg stà cuntents cun ils resultats da las votaziuns ed elecziuns ed era grazia a collegas sun jau vegnì a la conclusiun d’empè tugnar trasora, empruvar da far insatge encunter.

Suonda a bab e mamma

Sco ses geniturs è era Ursin Widmer commember da la Partida burgais-democratica (PBD). El na vesa quai dentant betg sco dischavantatg suenter las elecziuns naziunalas nua che la PBD ha pers vuschs. Insumma è el da l’avis che las partidas dal center ston a lunga vista fusiunar per furma in ferm center.

Mustgas per il Cussegl grond

Ch’el ha ambiziuns da far carriera politica e suandar ils fastizs da la mamma, Eveline Widmer-Schlumpf na sa el betg anc dir. Impurtant saja per el ussa en emprima linga dad esser pli activs politicamain e da candidar per la suprastanza da Favugn. Dentant lascha el sentir ch’el avess schon mustgas da candidar forsa ina giada per il Cussegl grond.

Las elecziuns èn questa saira las 20:00.

Ils candidats

Roland Schmid, anteriur / Beat Berni-Derungs, nov / Michael Forster, nov / Renato Gubser-Maurer, nov / Patrick Weissmann-Schälin, nov / Ursin Widmer, nov