Cura che nus emprendain la lingua materna, bajegiain nus si ina rait neurala en il center linguistic dal tscharvè. Sch’ins emprenda lura sco uffant giuven anc ina segunda lingua, lura schabegia quai en la medema rait, en il medem areal dal tscharvè. Sch'ins emprenda ina lingua pir sco uffant da 10 onns u sco creschì, vegn activada in’autra part da noss tscharvè.
Sis uras ad emna – è quai avunda?
In onn avant ch'ils uffants cumenzan cun la scolina van els mintgamai duas giadas ad emna en ina gruppa da termagls per vegnir en contact cun il tudestg.
Rico Cathomas di che quai tanscha, sche la finamira è sulettamain ch’ils uffants chapeschian la lingua e sappian far in fitg simpel discurs. Ma ì saja fitg impurtant da definir las finamiras, accentuescha il professur. Mintgin haja numnadamain autras finamiras cun emprender ina lingua.
Emprender ina lingua en scola va pli ditg – propi?
Emprender ina lingua cun far termagls dovra fitg bler temp. Bleras persunas sutvaliteschian il temp ch'i dovra, enfin ch'in uffant chapescha quella, declera Rico Cathomas. L'uffant haja da discurrer la lingua fitg bleras uras.
RTR actualitad 07:00