Siglir tar il cuntegn
Inhalt

Ulteriur Grischun Ems-Chemie cuntinuescha cun svilup positiv

La Ems-Chemie ha cumenzà bain il 2018: Da schaner fin mars è la svieuta creschida per 11,8% sin 595 milliuns francs.

Ils bajetgs da la Ems-Chemie a Domat.
Legenda: La Ems-Chemie ha pudì augmentar la svieuta, l'emprim quartal dal 2018. Keystone

Sco gia l'onn passà ha la Ems-Chemie puspè pudì augmentar la svieuta durant l'emprim quartal dal 2018. Uschia ha il concern grischun pudì augmentar las venditas da schaner fin mars per 11,8% sin 595 milliuns francs – cumpareglià cun l'onn avant. Quai resulta d'ina communicaziun da venderdi. Cifras davart ils gudogns da quartal, na publitgescha l'interpresa da la cussegliera naziunala Magdalena Martullo-Blocher mintgamai betg.

Grazia a novas fatschentas, haja il concern pudì engrondir sia posiziun sin il martgà. Er ils curs da valutas haja gì in effect positiv sin la svieuta. Ultra da quai ha la Ems-Chemie auzà ils pretschs da vendita, perquai ch'ils pretschs per materia prima èn s'augmentads.

En il sectur principal da polimers da gronda prestaziun ha Ems pudì augmentar la svieuta per 11,5% sin 521 milliuns francs. En il sectur lateral da chemicalias spezialas è la svieuta schizunt creschida per 13,6% sin 74 milliuns francs.

RR novitads 07:00