Siglir tar il cuntegn

Header

Video
EMS Schiers – Il ritmus ideal tranter scola e musica
Or da Telesguard dals 07.11.2019.
laschar ir
cuntegn

EMS Schiers Il ritmus ideal tranter scola e musica

La scola media evangelica a Schiers porscha dapi 11 onns in gimnasi da musica. Giuvens talents survegnan preparaziuns e cundiziuns idealas per pudair promover lur talent musical sper absolver la matura.

Absolver ils examens d’admissiun per in studi ad ina scol’auta da musica. Quai che blers aspirants dovran bunamain in onn da preparaziun duessan ils absolvents dal gimnasi da musica a Schiers dumagnar direct. Malgrà ch’il gimnasi da musica cumenza pir en la terza classa. Dal 2008 ha il magister da musica Martin Zimmermann lantschà questa sparta tut speziala.

Senza passiun na va quai betg

Ils talents ston mussar engaschament. Mintg’emna teoria da musica, sper lur instrument principal anc exercizi da chant e clavazin, trenament en gruppa e provas da chor. Ina giada l’emna lecziuns individualas tar in magister da scol’auta al conservatori a Feldkirch. E lura anc trenament individual en il temp liber. Lavurar effizient è la soluziun per dumagnar tut quai. Per la paja han els era il sustegn da la scola. Duas lecziuns l’emna per exempel san els mancar per pudair sa preparar per in concert. Il sustegn da la scola è adina qua.

Nus avain constatà ch’ils scolars emprendan fitg bain da s’organisar per ch’els san far tanta musica sco pussaivel sper lur pensums da scola.
Autur: Martin ZimmermannIniziant dal gimnasi da musica

Potenzial è anc grond

Malgrà concurrenzas da musica e reclama è Martin Zimmermann persvas ch'i dat anc in u l’auter talent musical che n‘è betg conscient da la purschida dal gimnasi da musica. Ina meglra collavuraziun cun las scolas da musica gidass bler. Ed era sin sustegn politic speran ins per contribuziuns che gidassan era als geniturs a finanziar la passiun da lur uffants.

TR Telesguard 17:40