Siglir tar il cuntegn
Inhalt

Ulteriur Grischun En il Signuradi vegn la tradiziun da vacanzas da vendemia vivida

Malgrà che las vacanzas da vendemia èn quest onn memia tard a Maiavilla, Fläsch e Jenins hajan divers uffants prendì dis da joker per pudair ir a prender giu ivas.

Questa fin d’emna han ins pudì degustar ils vins dal Signuradi, magliar ivas e giudair la festa da vin a Fläsch. Ils organisaturs han purschì program per giuven e vegl en il vitg vegl da Fläsch.

Vacanzas da vendemia crodan quest onn sper la vendemia

A partir dals 24 da settember han scolaras e scolars da Maiavilla, Fläsch e Jenins in’emna vacanzas da vendemia. Durant quell’emna èsi tradiziun d'ir en las vignas dal Signuradi a far vendemia. Quest’onn èn las vacanzas dentant memia tard – numnadamain pir suenter la vendemia. Quai per il motiv che la vendemia è quest'onn nunusità baud.

Sco Christof Kuoni da la cumissiun dal cussegl da scola da Maiavilla declera, hajan els definì l’entschatta da settember las vacanzas e lura quintà che quella saja la davos'emna da settember. El deplorescha che la vendemia saja uss en ils blers lieus tant sco tras e quai avant las vacanzas. Ma ils uffants che vulan ir en las vignas pon prender dis da joker sch'els vulan propi far vendemia. Tenor Kuoni haja bun mintga 6avel dals totalmain bun 300 scolars e scolaras prendì dis libers per far vendemia.

Tradiziun vivida

Pia vegnia la tradiziun dad ir a prender giu ivas durant l'emna da vendemia schon anc vivida. Sa chapescha oz betg pli uschia sco anc avant intgins decennis. Ma ils da Maiavilla, Fläsch e Jenins sajan cleramain colliads cun las vignas. Quai conferman er intgins purs da vin da Fläsch. Els hajan mintg'onn uffants sin lur bain che gidian durant la vendemia. Per quels saja prender giu ivas – en spezial er pudair seser en ils tractors e las maschinas – insatge spezial. E la finala hajan er diversas famiglias u parentella vignas, uschia ch'ils uffants hajan ina ferma colliaziun cun las ivas.

RR actualitad 17:00