Vi da la societad da participaziun Repartner Produktions AG - la nova possessura dals implants electrics dal Partenz - tegna l'interpresa Repower ina maioritad da 51%. Il rest tutga a 10 ulteriuras interpresas da provediment d'energia da la Svizra e dal Principadi da Liechtenstein.
La producziun d'electricitad da la Repartner Produktions AG sa basa sin la forza idraulica svizra e sin dus parcs da vent da la Germania. Dapi l'emprim da schaner 2017 possedan las interpresas dal provediment d'energia participadas ils dretgs da retrair l'energia da las ovras dal Partenz Claustra, Küblis e Schlappin.
Ils 21 d'october 2019 ha la regenza grischuna approvà da transferir las concessiuns per las lingias da deflussiun dal lai da Tavau, da Schlappin e da la Landquart da la Repower sin la Repartner Produktions AG.
RTR novitads 08:00