Siglir tar il cuntegn

Header

Simon Grimm avant il simbol RTR tar la chasa RTR.
Legenda: Simon Grimm è primassistent al Center for Space and Habitability a l'Universitad da Berna. RTR, Ronja Muoth
cuntegn

Exoplanets «Jau sai schon era discurrer sur dad auter che l’univers!»

Simon Grimm è primassistent al Center for Space and Habitability a l’Universitad da Berna e raquinta da ses mintgadi e co ch'igl è da lavurar ensemen cun ils dus titulars dal Premi Nobel en fisica, Michel Mayor e Didier Queloz.

Simon Grimm da Ftan en l’Engiadina Bassa ha adina savì ch’el vul vegnir astrofisicher u almain lavurar cun insatge che ha da far cun l’univers. La fascinaziun per il spazi ha l’um da 34 onns ertà da ses geniturs. Ses bab e sia mamma han adina raquintà da las stailas, dals planets e regalà ad el cudeschs «cun en massa da quella interessanta rauba».

Il mintgadi d'in astrofisicher

Simon Grimm lavura en la sparta dals exoplanets, quai èn planets che curseschan ordaifer noss sistem solar. La lavur dad el è da chattar novs exoplanets, dentant er da guardar tge cundiziuns ch’èn avant maun sin ils exoplanets gia chattads. Quai fa l’um, cun ina frisura in zichel sco Albert Einstein, cun scriver programs; per exempel per simular situaziuns en l'univers.

E dus ch’èn stads ils emprims che han chattà exoplanets, èn ils dus Svizzers da l’Universitad da Genevra Michel Mayor e Didier Queloz. Els vegnan onurads oz, ils 10 da december, cun il Premi Nobel en fisica.

Ch’ins enconuscha quellas persunas che survegnan quest premi è natiralmain enorm bel.
Autur: Simon GrimmPrimassistent a l'Universitad da Berna

Simon Grimm ha gia lavurà ensemen cun els dus. El manegia che survegnir in Premi Nobel en la sparta ch’ins lavuria sez saja ina gronda motivaziun ed ins vesia che quai interesseschia er autra glieud.

Grond fan da «The Big Bang Theory»

Simon Grimm è in fitg grond fan da la seria «The Big Bang Theory». Fitg bler saja propi sco en la seria. E massa sgnoccas che vegnian fatgas chapeschian ins meglier, sch'ins lavuria en quella branscha, manegia Simon Grimm tut entusiastic.

RTR actualitad 07:00

Artitgels legids il pli savens

Scrollar a sanestra Scrollar a dretga