A Favugn hai dà oz mesemna l'avantmezdi in accident da lavur. In bostger è sa blessà grevamain suenter ch'el è vegnì serrà en da blocs da laina.
Sco quai che la Polizia chantunala communitgescha, steva l'um sper ina pluna da bists durant ch'in helicopter ha sgulà plantas sin questa plazza. Cura ch'il helicopter ha deponì ina planta sin la pluna èn plirs bists sa mess en moviment. In bist è rullà sin l'um da 25 onns ed ha serrà en el. Collegas dad el han cun ina maschina spert pudì auzar il bloc da la planta. La Rega ha sgulà il grev blessà en l'Ospital chantunal a Cuira.