Siglir tar il cuntegn
Inhalt

Ulteriur Grischun Festa da Cuira cun radund 80'000 visitaders

Dumengia suentermezdi è la festa da la citad da Cuira ida a fin. Durant ils trais dis da festa hajan radund 80'000 persunas visità la festa. Il comité d'organisaziun e la polizia da la citad fan ina bilantscha positiva, quai scriva la citad da Cuira.

Massa glieud en las giassas da Cuira.
Legenda: La festa da Cuira ha carmalà 80'000 persunas en las giassas da Cuira malgrà la plievgia da venderdi saira. MAD

Durant trais dis è la chapitala grischuna stada in mekka da festa. Sin divers plazs da la citad hai dà musica da saut, ustaria e program d'uffants. Sco il comité d'organisaziun e la polizia da la citad scrivan, sajan er quest onn radund 80'000 persunas stadas a la festa. Er il concept da segirtad saja sa cumprovà. Tenor la polizia da la citad hajan els gì 67 intervenziuns da polizia questa fin d'emna. 38 da quellas sajan stadas en connex direct cun la festa da Cuira. Tar questas intervenziuns sa tractia quai d'agid a visitaders, acts da violenza, donn da material u er intervenziuns pervia da conflicts.

84 persunas han stuì vegnir tractadas

L'uniun samaritana e las forzas da salvament hajan stuì tractar quest onn 84 persunas. Quai èn dubel uschè bleras sco l'onn passà. Tenor il comité d'organisaziun saja quai dentant betg alarmant, pertge qua sa tractia quai da pitschnas chaussas sco guegls u er sa tagliadas. Da quellas 84 persunas hajan set stuì ir en l'ospital. Er il scumond da fieu saja vegnì respectà.

Circa 8'000 bindels vendids

Quants bindels che sajan vegnids vendids durant la festa na sappian ins betg anc dir exact. Cunquai ch'era uniuns hajan vendì quest onn il bindel che custa 10 francs e sustegn la finanziaziun da l'occurenza. Tenor emprims resuns saja la cifra circa tar 8'000 bindels vendids. La cifra exacta datti en il decurs dals proxims dis.

La festa ha survegnì il premi «prix naturemade 2018». Quai pervia ch'ils organisaturs han fatg diever d'electricitad ecologica.

RR novitads 18:00