La sonda passada è la citad veglia da Cuira stada emplenida cun ortulans da hobi. La «Pro Natura» dal Grischun sco era la «ProSpecieRara» han organisà ina fiera da plantinas. Ina massa glieud è vegnida ensemen per cumprar, mirar è s'infurmar. Igl è stà d'admirar ina gronda variaziun da tuttas sorts flurs e plantinas da legums e fritgs. Ultra da quai hai era dà ervas e bler auter.
Promover sorts veglias per dapli biodiversitad
Sco la presidenta da la «Pro Natura» dal Grischun, Jacqueline von Arx, declera, èsi per els stà impurtant da pudair porscher surtut plantinas e sems da sorts veglias. Uschia possian ins far l'agen iert pli natiral. Vinavant duajan las sorts veglias d'ervas e legums porscher ina experientscha culinarica. Er Nadja Kaltbach-Wyss da la «ProSpecieRara» di ch'era plantinas da niz duajan esser represchentadas a moda biodiversa e betg mo las plantinas selvadias.
Participaziun da blers auter chantuns
Per la fiera da plantinas èn il vendiders vegnids da tut la Svizra. Uschia era Peter Müller dal chantun Argovia. El posseda cunzunt in grond dumber da sorts veglias da rosas.
Las rosas èn las reginas da las fluras. Mintga rosa ha in'odur unica.
El sa participescha a quasi tut las occurenzas che la «ProSpecieRara» organisescha. Spezialmain qua a Cuira haja el grond plaschair. Ils Grischuns sajan averts e fitg simpatics. Els mussian era in grond interess vid las plantinas e s'infurmeschian gugent davart quellas.
RR novitads 12:00