La fin d'emna cun temperaturas primavaunas ha carmalà blera glieud ora sin via. La polizia da la citad da Cuira ha gì dad intervegnir perquai radund 30 giadas da venderdi enfin dumengia – e quai pervi da cuntravenziuns cunter la lescha da traffic, disturbis da canera, donns materials ed in accident cun in e-scooter.
Sco quai che la polizia da Cuira communitgescha èn trais automobilists vegnids denunziads, perquai ch'els han fatg canera cun ils motors da lur vehichels. da quels ha stuì dar giu il permiss da charrar pervi d'in test d'alcohol positiv. Ultra da quai ha la polizia fermà ina giuvna sin ina moto electrica ch'era curt avant vegnida engulada.
Canera en citad veglia
Reclamaziuns pervi da canera hai surtut dà en la citad veglia, nua che las terrassas da restaurants avertas han carmalà blera glieud. Per far valair ils temps da ruaus e las reglas da corona saja stà da far blers discurs sco er intginas admoniziuns. Singulas persunas renitentas hajan er survegnì in chasti. La collavuraziun cun ils ustiers haja per gronda part dentant funcziunà bain, scriva la polizia da la citad da Cuira.
Ord l'archiv:
Avant bun in onn ha la polizia da la citad da Cuira tratg bilantscha suenter l'emprima emna dal lockdown.
