Siglir tar il cuntegn

Header

Greta Thunberg.
Legenda: En dumondas dal clima duaja la politica tadlar pli ferm sin la giuventetgna e sin la scienza. Quai ha pretendì Greta Thunberg il mardi a chaschun dal WEF a Tavau. Keystone
cuntegn

Forum mundial d'economia Greta Thunberg pretenda dapli attenziun per la generaziun giuvna

L’activista dal clima Greta Thunberg ha tegnì il mardi a bun'ura in pled al Forum mundial d’economia a Tavau. A quella chaschun ha ella pretendì en dumondas dal clima dapli attenziun per la generaziun giuvna e la scienza.

Thunberg ha appellà a la cuminanza internaziunala da tadlar pli ferm sin la generaziun giuvna, quai che pertutga dumondas dal clima. La savida e la vusch dals giuvens na stettia betg en il center da la discussiun, quai stuessi però esser il cas, ha ditg la Svedaisa da 17 onns.

Surtut sin nivel politic na saja de facto vegnì fatg nagut per rinforzar la protecziun dal clima. Quai stoppia uss sa midar. La scienza stoppia vegnir integrada pli fitg en l'entira debatta davart il clima, ha pretendì Thunberg.

I dovria anc bler dapli mesiras

Ch'i dettia ina allianza dals moviments cun ina finamira cuminaivla da proteger il clima, saja gia in grond pass. Clima ed ambient sajan grazia als giuvens daventà in impurtant tema, ha ditg Greta Thunberg. I saja bain gia capità fitg bler, per propi proteger il clima saja dentant anc da prender bleras autras mesiras.

Thunberg ha tranter auter inspirà il moviment mundial «Fridays for Future». Il magazin «Time» ha elegì ella sco «persuna da l'onn». L'onn passà ha Thunberg ultra da quai survegnì il Premi Nobel alternativ.

Ord l'archiv:

Video
Greta Thunberg, la pli enconuschenta activista da clima dal mund
Or da Minisguard dals 26.01.2019.
laschar ir

Per tadlar curt e concis:

RTR novitads 12:00

Dapli da Grischunavrir la Landingpage

Nach links scrollen Nach rechts scrollen