La reavertura saja vegnida nunspetgadamain baud. Blers ustiers e bleras ustieras avessan anc spetgà gugent ina u duas emnas. Tranter auter era Sandra Brunner dal «Calanda» e Roland Dick dal «Zollhaus». Els avessan gugent gì dapli temp per s’organisar e pinar tut il necessari. Er auters ustiers èn da l’avis che la glieud na saja anc betg stada pronta per ina reavertura da las ustarias.
Quai saja era sa mussà en il dumber da giasts. En bleras ustarias sajan ils emprims dis mo fitg paucs vegnids a mangiar.
L’emprim ha la glieud puspè stuì survegnir la fidanza en la gastronomia. Ma, mintga di èn insaquants dapli vegnids.
Il «Da noi» saja stà occupà cumplettamain mintga saira, sco il giuven ustier Toni Curdin Foppa ha ditg. Ma i na rendia tuttina betg, di el sco er tut ils auters ustiers dumandads. Cunzunt Sandra Christoffel che maina il café «Patschifig» n'è il mument insumma betg cuntenta cun il dumber da giasts.
Ma sch’i va vinavant uschia essan nus sin buna via.
Las ustarias han stuì reducir lur maisas e sutgas sco era metter plexiglas u tendas tranter las maisas.
