Siglir tar il cuntegn
cuntegn

Ulteriur Grischun GEA a Claustra-Serneus: Cun «Ober Ganda» a nova vita turistica

Ils da Claustra-Serneus han acceptà cun 53% ina midada da zona e fatg libra uschia la via per il project dal vitg da vacanzas «Ober Ganda». Quel prevesa da realisar 550 letgs novs e da dar schlantsch uschia al turissem.

La visualisaziun dad intginas chasas amez il vitg, fabritgadas en stil da chalets gronds sco usità a Claustra.
Legenda: «Ober Ganda» – Ina visualisaziun dal project planisà. mad
  • 53% GEA cun 986 : 872 vuschs
  • Participaziun a votaziun: 60,66% (da 3'157 votantas e votants)

La votaziun davart il project «Ober Ganda» para dad avair mobilisà las votantas ed ils votants da Claustra-Serneus: Dus da trais – u 60,66% – eran a l'urna.

Il suveran approvescha cun la votaziun da la dumengia ina midada da zona ed in contract en dretg da construcziun tranter las pendicularas e la vischnanca.

Suveran sustegna lingia da vischnanca

Uschia segua la populaziun a la proposta da la vischnanca e metta la basa per il project «Ober Ganda» dal qual che Claustra sa spetga nov schlantsch per il turissem – uschia il suprastant Florian Thöny: «Nus spetgassan radund 55'000 pernottaziuns ad onn».

La radunanza da burgais ha gia ditg gea al project, quai cun 58 cunter 7 vuschs.

«Ober Ganda» è in project da las pendicularas

Sin il grond areal da parcadi a Claustra vitg, che vegn actualmain duvrà da las pendicularas Claustra-Madrisa, duessi dar in grond resort da famiglias. Il vitg da vacanzas cun in hotel e pliras chasas da vacanzas duess porscher var 550 letgs.

La responsablad per il project è tar las pendicularas Claustra Madrisa: Las pendicularas èn perquai a la tschertga d'in investur che vegniss da purtar ils custs da radund 40 milliuns francs.

RR actualitad 14:00