Siglir tar il cuntegn
cuntegn

Ulteriur Grischun GEA a Panaduz: «Precis qua» datti la nova halla polivalenta

Tant la scola sco er las uniuns da sport e cultura da Panaduz pon s'allegrar: Ellas survegnan lur halla multifuncziunala. Il suveran ha ditg cun 83 % GEA al project amez il vitg. A l'urna èn ids 48 % da las votantas ed ils votants.

Visualisaziun dad ina halla amez il vitg.
Legenda: Visualisaziun dal project per Panaduz. mad
Il basegn per ina halla pli gronda han las uniuns da sport adina puspè deponì.
Autur: Elita Florinpresidenta communala, Panaduz

Ed ussa èsi gartegià: Cun 896 GEA cunter 186 NA han ils da Panaduz ditg GEA als 17,9 milliuns francs per la halla multifuncziunala. Els han acceptà il credit che la vischnanca ha preschentà per pudair realisar il project.

La dunna cun charta.
Legenda: La presidenta communala da Panaduz Elita Florin mussa il lieu nua che la halla è planisada. RTR, Toni Poltera

17,9 milliuns francs – e tuttina in pe da taglia da 88%

Er sche la halla multifuncziunala custa prest 18 milliuns francs po Panaduz restar enfin il 2021 tar in pe da taglia da 88 %. «En la summa che va avant il pievel èn calculads tut ils custs», aveva argumentà la presidenta communala Elita Florin-Caluori avant la votaziun il credit, «er ils custs per sanar la scola e la halla existenta»:

Il modell.
Legenda: Il model da la halla polivalenta e l'engrondiment da la scola: Il project nov è planisà amez il vitg. mad

La halla vegn construida sin in plaz da sport existent e cumpiglia ina halla da sport dubla, ina sala cun tribuna fixa e divers locals da scola.

Petiziun da las uniuns ha gì success a la fin

Las uniuns avevan adina puspè fatg valair lur basegns. Il 2015 avevan ellas inoltrà ina petiziun. E cunquai ch'er la scola ha memia pauc plaz aveva la vischnanca piglià enta maun il project.

Ensemen cun las uniuns da sport e da cultura e cun la scola era il project vegnì lantschà. Entaifer 12 mais eran vegnidas fatgas las lavurs da preparaziun per stgaffir la basa da decisiun per il suveran.

RR novitads 11:30