Tant l'ediziun speziala dals 24 da schaner cun il titel «Ils fats tar la votaziun dals 12 da favrer» sco er ils singuls artitgels sajan reclama zuppada per in GEA a gieus olimpics, uschia la rinfatscha da Walter von Ballmoos (PVL) e Philipp Wilhelm (PS).
Reclama ha da vegnir declerada sco tala, pretendan ils recurrents
En ina communicaziun a las medias scrivan els perquai da vulair laschar sclerir la dumonda, sche tala reclama zuppada valia insumma sco pressa. Reclama saja da marcar cleramain sco reclama, uschia argumenteschan ils dus umens lur recurs. L'ediziun speziala sa preschentia dentant sco cuntegn redacziunal.
Sin dumonda da Radio SRF ha confermà la «Davoser Zeitung», che l'ediziun speziala saja vegnida pajada e na saja betg stada marcada sco reclama.
I sa tractia da «native advertising», argumentescha la Somedia
A radio SRF conferma Andrea Masüger, il manader da gestiun da la Somedia ed uschia da la chasa editura da la «Davoser Zeitung», ch'i sa tracta da reclama. I sa tractia dad «ina furma moderna da native advertising, co quai ch'ella vegn fatga era dad autras chasas edituras». Damai ina furma da reclama che n'è betg pli d'enconuscher sco tala.
Tgi che paja, cumonda
Masüger declera vinavant, che tar l'ediziun speziala, saja decisiva la vista dal client e betg ina «vista publicistica surordinada». «Sa chapescha», ch'era ils adversaris dad Olimpia avessan pudì dar l'incumbensa per ina tala ediziun, ha ditg Andrea Masüger envers il radio SRF.
Recurrents supponan «problem tar editur»
En lur communicaziun han ils dus politichers von Ballmoos e Wilhelm er crititgà l'editur da la Somedia, Hanspeter Lebrument. Els «supponan il problem tar l’editur». I saja enconuschent che Hanspeter Lebrument è in aderent da gieus olimpics d’enviern. Perquai hajan els rendì attent, ch’il problem na saja tant tar la redacziun, ma tar la chasa editura.
Tar lur recurs na giaja quai als recurrents betg mo per la votaziun dals 12 favrer, mabain per «il dretg fundamental da las burgaisas ed ils burgais sin infurmaziun equilibrada», scrivan els en lur communicaziun.
RR novitads 14:00