Siglir tar il cuntegn

Ulteriur Grischun Grischun e Son Gagl dumondan permissiun da sajettar lufs

La rotscha lufs al Calanda demussa in cumportament pli e pli problematic. Per ch'ils lufs daventian puspè timids envers l'uman, duain 2 animals vegnir allontanads da la rotscha. Ils chantuns Grischun e Son Gagl han perquai dumandà ina permissiun da sajettar lufs da l’Uffizi federal d'ambient (UFAM).

Legende: Video Grischun e Son Gagl dumondan permissiun da sajettar 2 lufs abspielen. Laufzeit 3:15 Minuten.
Or da Telesguard dals 30.11.2015.

Ils lufs observads ed il cumportament en lur intschess èn vegnids protocollads e valitads cuntinuadamain tras las collavuraturas ed ils collavuraturs dals uffizis cumpetents dals chantuns Grischun e Son Gagl.

Cumportament problematic

Fin ussa n'hai anc dà naginas situaziuns privlusas directas per l'uman. Ils ultims mais hai dentant dà pli e pli savens scuntradas a curta distanza tranter umans e lufs en u enturn ils abitadis, scriva il Departament da construcziun, traffic e selvicultura.

Singuls u plirs lufs sajan s'avanzads fin a portas da stallas, a saivs da stallas libras u ad edifizis e sa laschaian stgatschar mo fitg navidas. Suenter plirs incidents è il cumportament da la rotscha vegnì valità sco problematic.

Sajettar 2 lufs duai midar il cumportament dals lufs

Per cumbatter cunter quest svilup duain vegnir sajettads quest enviern 2 animals da la rotscha dal Calanda. Ils chantuns Grischun e Son Gagl han inoltrà ina dumonda correspundenta a l'uffizi federal responsabel, vul dir a l'Uffizi federal d'ambient (UFAM).

Las sajettadas han la finamira da cuntanscher ina midada da cumportament. Mo sch'ils lufs daventan puspè pli timids, vegn ina convivenza da quests animals da rapina gronds cun ils umans ad esser pussaivla en la cuntrada cultivada svizra er en l'avegnir.

Las basas giuridicas èn avant maun

Tras la revisiun da l'ordinaziun federala da chatscha ha la Confederaziun stgaffì la stad 2015 las basas giuridicas necessarias en chaussa. Actualmain permetta la lescha dentant be da sajettar giu lufs sch’els demussan in cumportament problematic e sch’il triep è sa reproducì. Lura po mintgamai la mesadad dal dumber da pitschens lufs ch’igl ha dà durant in onn, vegnir sajettà. I na dependa dentant betg tgenins lufs che vegnan sajettads en quel cas.

En l’avegnir duessi er esser pussaivel da reglar il dumber da lufs sco p. ex. il dumber da tschiervs senza ch’ils lufs demussian in cumportament problematic. La Confederaziun elavura actualmain ina lescha persuenter che sa basa sin ina moziun da cusseglier dals chantuns Stefan Engler.

RR novitads 10:00