Siglir tar il cuntegn
Inhalt

Ulteriur Grischun Gronda fulla a las cursas da chavals a Maiavilla

A Maiavilla èn ils organisaturs fitg cuntents cun las cursas da chavals internaziunalas. Suenter ch'els han l'onn passà anc stuì stritgar omaduas fin d’emnas da cursa e porscher mo in di redimensiunà, èn las cursas da quest onn in success cumplain.

Aspectaturs a las cursas da chavals a Maiavilla che guardan ina cursa.
Legenda: Radund 18'000 aspectaturs ed aspectaturas han guardà las cursas a Maiavilla. RTR, Angela Hendry

L’onn passà eran las cursas da chavals internaziunalas vegnidas stritgadas. Pervi da plievgia intensiva era il terren lomià uschè fitg che la segirtad da chavals e chavaltgaders n’èra betg garantida. L’infrastructura era dentant gia avant maun e stueva vegnir pajada. Uschia han ils organisaturs decidì da porscher in di da cursa redimensiunà, cun in percurs pitschen ed infrastructura simpla.

Bell’aura attira 18’000 persunas

Il sulegl e las temperaturas da stad han carmalà millis a Maiavilla. Per Ruedi Niederer, president dal comité d’organisaziun è la 62avla ediziun da las cursas in success cumplain. Il public saja uschè fidaivel, quai saja simplamain grondius. Il deficit da l’onn passà n’haja betg periclità l’ediziun da quest onn, els hajan duvrà reservas, la cassa da mal’aura n’hajan els betg stuì duvrar.

In bun pulstrà

Per il futur è il president optimistic. Sch’els stoppian puspè stritgar cursas hajan els anc la cassa da mal’aura. Sulet in giavisch ha el. I dastgass dar dapli chavaltgaders che sa participassan a las cursas, la stad sajan blers chavals stads blessads. En general haja quai paucs chavals che siglian sur obstachels, perquai sajan els en contact cun chavaltgaders da l’exteriur.

Purtret da Ruedi Niederer, president dal comité d'organsiaziun.
Legenda: Ruedi Niederer, president dal comité d'organisaziun. RTR, Angela Hendry

RR actualitad 07:00