La Svizra duai s'engaschar cunter l'explotaziun illegala dad aur en la regiun da l'Amazonas. Quai ha pretendì Juan Guaidó, ch'ha nominà sasez sco president intermediar da la Venezuela. Cunzunt duaja la Svizra – ch'è il pli grond martgà da commerzi dad aur dal mund – evitar da finanziar l'explotaziun. Ils daners che vegnian gudagnads uschia, giajan en las tastgas da la regenza venezolana da Nicolas Maduro, sco er a la gruppa da guerriglia «Armada naziunala da la liberaziun» en la Columbia.
En pli ha Guaidó appellà a la cuminanza internaziunala da betg laschar perder ses pajais. I saja da liberar ses pajais da la dictatura dal president Maduro. Dapi radund in onn cumbattan Juan Guaidó ed il president en uffizi Nicolas Maduro per la pussanza en la Venezuela.
Guterres fa endament las finamiras dal clima
Il secretari general da l’ONU, António Guterres ha avertì al WEF che la politica dal clima pudess far naufragi: L’umanitad saja vidlonder da perder quest cumbat. Ultra da quai ha Guterres deplorà ch’i manchia la veglia politica da cuntanscher las finamiras dal clima.
En quest connex ha Guterres pretendì da desister dad investiziuns nuschaivlas a l’ambient – quai en favur da l’uschenumnada «economia verda».
Il planet na vegnia betg destruì. Però destrueschia l’umanitad sia capacitad da viver sin quel, ha ditg il secretari general da l’ONU vinavant.
RTR novitads 06:00
