Siglir tar il cuntegn

Header

video
Il santeri en il guaud
Or da RTR Social dals 14.08.2020.
laschar ir
cuntegn

Guaud Panaduz In santeri in zic different

Panaduz ha dus santeris. In è, sco usità en ils blers vitgs, sper baselgia. L'auter però sa chatta amez il guaud.

L'idea ha Andreas Moser, manader servetschs communals, gì il 2017. Da santeris en la Bassa è el stà inspirà ed ha sinaquai preschentà sia idea als da Panaduz. El haja gì da far bain in pau lavur da persvasiun. Ma la fin finala eran tuts persvas – era ils dus spirituals dal vitg.

Ina nova furma

Il santeri è en il guaud ed ins po tscherner la planta, nua ch'ins vul vegnir sutterrà ina giada. La schelta è gronda, en total stattan 100 plantas a disposiziun sin ina surfatscha da quatter hectaras. 11 da quellas èn gia occupadas.

  • 54 pigns
  • 10 lareschs
  • 31 tieus
  • 6 faus

Nagina decoraziun

Damai ch'il santeri è en il guaud, valan era las «reglas» da guaud. Vul dir, igl è scumandà da metter nà fluras, perquai che la lescha da guaud scumonda en general da plantar flurs en guauds en Svizra. I possia dar, ch'i saja in pitschen anghel u cristal là, quai saja lura en urden. Però pli grondas chaussas n'èn betg lubidas sco decoraziun e vegnan lura allontanadas.

Varts negativas e nunspetgadas

Avant che avrir il santeri ha Andreas Weber, ensemen cun selviculturs, allontanà plantas flaivlas che pudessan cupitgar. Plinavant hajan els concepì e chavà novs trutgs tras il guaud. Quai apprezieschia la glieud fitg.

Ma tuttina avevan els in tschert respect dal project. Co vegn la glieud a reagir? Vegnan els ad ir tras il guaud u guntgir el?

Vegnì èsi la finala tut auter. Il resun è oramai positiv davart il santeri en il guaud. Persunas turnan gugent, er suenter la sepultura.

In santeri per mintgin che vul

Laschar sepulir po mintgin che vul a Panaduz en il santeri da guaud. Era betg-burgais dal vitg. Principalmain vegnian persunas, ch'han gì ina relaziun cun la natira, ch'eran gugent là.

video
Tgi vegn tut qua?
Or da RTR dals 14.08.2020.
laschar ir

Da purla a purla - en il ver senn dal pled

Il bi vid in santeri da guaud è, tenor Andreas Weber, ch'ins possia serrar il ciclus da la vita. Sco quai ch'i vegn ditg en la Bibla, èn ins purla e daventa purla. Cun svidar ora la tschendra (vaschès na vegnan betg sepulids en il guaud) giascha la pulvra puspè enavos en la natira. Ella nutrescha la planta per pudair crescher vinavant.

video
Atgnamain ina planta normala
Or da RTR dals 14.08.2020.
laschar ir

RTR actualitad 11:00

Artitgels legids il pli savens

Scrollar a sanestra Scrollar a dretga