Siglir tar il cuntegn
Inhalt

Ulteriur Grischun Haldenstein: Giuven disgrazià tar accident cun auto engulà

La notg passada ha in giuven prendì l’auto dad in confamigliar ed ha fatg ina tura cun collegas. Sin quella tura è l’auto glischnà ed i ha dà in accident. In dals 5 giuvens, ch’eran en l’auto, saja mort, scriva la polizia chantunala en ina communicaziun a las medias.

Il lieu da l'accident.
Legenda: Tschintg giuvens era en l'auto cur che quel è glischnà sur via ora e collidà cun in distribuider electric. MAD

A Cuira ha prendì la notg da venderdi sin sonda in giuven (18) cun permiss d’emprender l’auto dad in confamigliar. Ensemen cun quatter auters giuvens era el in viadi sin ina via laterala da Haldenstein in direcziun Oldis. En ina lunga storta a dretga ha el pers la controlla da l'auto. L'auto è glischnà sur via ora e collidà là vehementamain cun in distribuider d’electricitad. Tar quel accident è in (17) dals tschintg giuvens en l’auto vegnì blessà mortalmain.

Ina patruglia da la polizia da la citad ha registrà la notg las 02:30 l’accident ed ha immediatamain alarmà la polizia chantunala. In giuven levamain blessà è vegnì tgirà dad in team d’ambulanza. Uss investigheschian la procura publica e la polizia chantunala las circumstanzas exactas da l’accident concluda la polizia sia communicaziun.

RR novitads 14:00