Il nov directur Hans-Andrea Tarnutzer vegn or da las atgnas retschas. Sco la scola scriva instruescha el dapi il 1992 ils roms fisica e sport a la EMS da Schiers. Christian Brosi va suenter 20 onns a la testa da la scola en pensiun.
Era elegì è il nov president da l'uniun scolastica. Qua surpiglia il vicepresident d'enfin qua, Hans Peter Kocher l'uffizi da Jürg Knaus ch'è stà president enfin qua. Questa midada duai succeder gia sin l'entschatta d l'onn 2017. Knaus è vegnì undrà da la radunanza per ses engaschament d'en tut 23 onns per la scola evangelica.
Investiziuns per il svilup da la scolaziun
Ils commembers da l'uniun han plinavant approvà investiziuns da construcziun d'en tut 6,5 milliuns francs. Quellas construcziuns duain succeder dal 2017 enfin il 2019. En trais etappas duai il bajetg principal vegnir renovà. Questas sanaziuns pon vegnir fatgas grazia a las contribuziuns dal chantun.
Investà vegn era en il svilup da la scolaziun. Là è vegnì lantschà il project «EMS 2018». Quest project sa chatta per il mument en la fasa da realisaziun. Tema principal è il svilup en la qualitad da l'instrucziun.
Bilinguitad tudaistg-englaisa tira
Bun success ha la scola gì cun introducir ina classa che po far la maturitad bilingua en tudaistg ed englais. La dumanda saja stada uschè gronda che na betg tut ils interessents hajan gì plaz en questa classa. Era per il nov temp da l'urari – danovamain entschaiva la scola pli tard, las 8:15 – tiran els in fazit positiv.
RR novitads 17:00