Siglir tar il cuntegn
cuntegn

Ulteriur Grischun I dat interessents per la praschun dal Sennhof

200 onns era il Sennhof il stabiliment serrà dal Grischun. Cun la nova praschun a Cazas ch'avra il 2019, nagin che sa tge far cun il Sennhof a Cuira. Quasi nagin...

bajetg dal sennhof
Legenda: La praschun Sennhof al pe da la vigna episcopala cun vista sin la citad veglia da Cuira. Keystone

Cun la nova praschun serrada a Realta, sin territori da Cazas, daventa il Sennhof a Cuira inutil. Era per l’administraziun chantunala na datti nagina utilitad, uschia il cusseglier guvernativ Mario Cavigelli. Uschia vul il chantun vender il Sennhof en mauns privats. La valitaziun actuala da l'edifizi è tar 14 milliuns francs. Per quant ch'el vegn lura propi vendì, dependa da las ideas e las pussaivladads.

Domenig mussa interess

Thomas Domenig Senior è conuschent per sias grondas visiuns. Sin dumonda dal Radio Rumantsch ha el confermà, ch'il Sennhof è in mintga cas in edifizi interessant. Dentant saja quai l'emprim da guardar, tge custs e pussaivladads ch'i dat tar il Sennhof. Pir lura possia el era dar explicaziuns pli precisas.

Chantun na venda anc betg ussa il Sennhof

Tenor Markus Dünner, da l'Uffizi da construcziun auta, n'ha il chantun anc betg planisà las formalitads, co vender il Sennhof. Era l’opziun da betg vender, dentant dar il dretg da bajegiar, vesa el sco opziun. Plans concrets, coi duai ir vinavant cun il Sennhof or da vista dal chantun, vegnan pir fatgs il 2018. Vul dir, in onn avant ch'igl è planisà da midar da la veglia en la nova praschun.

RR actualitad la saira 17:00