Siglir tar il cuntegn

Header

Il convict a Cuira.
Legenda: Il betun en il spessom: Il convict sin la plaunca sur Cuira. Biblioteca chantunala dal Grischun
cuntegn

Ulteriur Grischun Il «bloc da betun» sur Cuira duai vegnir sanà

La chasa d'abitar per scolars a Cuira, il convict, duai vegnir modernisà ils proxims onns. Surtut ils indrizs sanitars e las installaziuns tecnicas stoppian vegnir adattadas al temp, di il schef da l'Uffizi da construcziun auta dal Grischun, Markus Dünner. La cumparsa dal bajetg duai dentant restar.

«Il bloc da betun è in monument architectonic dals onns 60»

Il convict è vegnì bajegià l'onn 1968 da l'architect turitgais Otto Glaus ed è in tipic bajetg da betun dals onns 60, construì en furma da terrassas en la plaunca si sur Cuira.

Ensemen cun la scola chantunala e l'anteriur seminari da scolasts saja il convict in monument architectonic dals onns moderns suenter la guerra, uschia Markus Dünner.

Era sch'il bajetg na saja betg sut protecziun, saja quai da mantegnair sia cumparsa.

Cumenzar a sanar il 2018

Il chantun ha scrit ora ina concurrenza per ina sanaziun generala dal convict. Sper la fatschada saja surtut da modernisar las installaziuns sanitaras e tecnicas en l'intern dal bajetg. Dapli plaz na porscha il convict betg en l'avegnir: I resta tar circa 100 letgs per scolaras e scolars.

Ils custs na vul il chantun anc betg tradir, els sajan part da la concurrenza. Il Cussegl grond sto anc deliberar in credit per la sanaziun. Sche tut va tenor plan, lura duain las lavurs cumenzar il 2018.

RTR/nc/alb