Siglir tar il cuntegn

Header

L'outlet a Landquart.
Legenda: Il chantun na vul betg controllar las cifras furnidas dal outlet. mad
cuntegn

Ulteriur Grischun Il chantun sa fida da las cifras da l'outlet Landquart

Il sindicat «Unia» vul controllar anc ina giada las indicaziuns da l'outlet a Landquart pertutgant la lubientscha da laschar avert las portas er la dumengia. Il chantun è dentant persvadì da las cifras inditgadas.

Davent dals 2 da fanadur dastga il center da cumpra «Designer Outlet» a Landquart avrir uffizialmain sias portas la dumengia senza lubientscha speziala. El vala sco interpresa che serva al turissem internaziunal. E quai ha l'outlet pudì cumprovar al chantun ed al secretariat da stadi per l'economia Seco. El haja mussà si, che varga 20 pertschient da la rauba vegnia vendida a persunas da l'exteriur. Quai cun far controllas dals numers dals autos da l'exteriur sin il parcadi, cun examinar ils rendaquints da cartas da credit da clients da l'exteriur ubain cun inditgar las cifras da la restituziun da la taglia sin la plivalur.

Per il chantun bastan las infurmaziuns

Per il chantun è quai avunda mussaments. El ha er betg fatg atgnas controllas supplementaras, di Paul Schwendener, manader da l'uffizi per industria, mastergn e lavur. Quai saja usità da sa fidar sin las cifras che vegnan preschentadas. «Er tar bleras autras dumondas na van ins betg a chasa tar las persunas e guarda en lur scrivania». I dettia adina puspè persunas ch’inditgeschan fatgs fauss sin las dumondas, dentant giaja l'uffizi en principi da quai anor, che las indicaziuns sajan correctas. «Nus giain da quai anor ch'il burgais è sincer e fair.» Ed er cunter las vuschs criticas che dian ch'il chantun haja forsa betg controllà uschè sever perquai ch'el ha sez er in interess che l'outlet stettia averts las dumengias, sa defenda Schwendener: «Segir avain nus in interess che quellas plazza da lavur restian e ch'i va bain cun l'economia grischuna, quai munta dentant betg che l'uffizi opereschia cun faussas indicaziuns.»

L’expert conferma quai è in normal agir dal chantun

Ed er l'expert per dretg da lavur da l'universitad S. Gagl Thomas Geiser conferma ad RTR, ch'il chantun na stoppia far naginas controllas supplementaras sch'ils documents inoltrads sajan persvadents. Il chantun han els persvadì, il sindicat «Unia» dentant anc betg. Lez metta en dumonda la decisiun da l'uffizi federal per economia e crai betg ch'ina gronda part dals clients da l'outlet è da l'exteriur.

RR Actualitad Bunura 06:00

Artitgels legids il pli savens

Scrollar a sanestra Scrollar a dretga