Siglir tar il cuntegn

Header

cuntegn

Ulteriur Grischun Il corp emprenda da guarir sasez

Dapi passa 30 onns sviluppescha Maria Schmid-Spirig da Cuira ina metoda che duai gidar il corp da medegiar sasez, la metoda ABL. Ella lavura cun vitamins, meridians e la dretga maglia. Prest festivescha ella ses 70avel anniversari. Tgi surpiglia in di la metoda ABL?

Tgi che va tar Maria Schmid-Spirig sto giaschair sin ina maisa. Alura mira ella, tge ch’il corp dovra. Ella fa ina dumonda e tira vi da la bratscha. Sch’il corp di gea, è la bratscha medem lunga, sch’el di na, reageschan tscherts musculs ed in bratsch para pli curt che tschel. Quai sa numna 'prova da reflex'.

Na supponer nagut

Maria Schmid Spirig è scolasta, pedagoga curativa, psicologa, chinesiologa ed ella ha sviluppà la metoda ABL. Il mument ch’ella dumonda il corp sto ella esser uschè neutrala sco pussaivel, senza avair in'idea en il chau.

Midada cuntinuanta e fascinaziun dal corp

Passa 30 onns sviluppescha ella gia sia metoda, ed ella sa mida cuntinuadamain. Era ils carstgauns e l’ambient sa midian, di Maria Schmid-Spirig. Uschia n’ha ella era betg tema da radiaziuns da telefonins ubain undas da las raits da WLAN.

Ella saja adina puspè fascinada, tge ch’il corp possia prestar, tar accidents, malsognas ma era tar gravidanzas. Dentant ha Maria Schmid-Spirig prest 70 onns. Sia sora che gidava ella, ha chalà da lavurar.

Anc nagina successura

Maria Schmid-Spirig n’avess nagin problem, sche la metoda ABL giess a fin cun ella. Dentant datti ina gruppa da scolaras che vuless manar vinavant ABL. Ina da questas scolaras è Carla Guldimann da Trun.

purtret da Carla Guldimann
Legenda: Carla Guldimann. Cussegliadra d'ABL da Trun. RTR/ah

Carla Guldimann è terapeuta da flad e cussegliadra d’ABL diplomada. Ella surpiglia gia oz pazients da Maria Schmid-Spirig, e per ch’i dettia era ABL en il futur è ella sa messa ensemen cun autras scolaras.

Ellas veglian star vidlonder e sviluppar vinavant la metoda. In fervent giavisch è che Maria Schmid-Spirig scrivess anc in segund cudesch.

Anc plain energia

Il mument na vuless Maria Schmid-Spirig betg chalar da lavurar. Ella lavuria fin ch’ella dettia enturn. Lavurar fetschia bain ad ella. Ella vegni en contact cun blera glieud ed ella haja occupaziun.

RR actualitad 08:00

Artitgels legids il pli savens