Siglir tar il cuntegn

Header

cuntegn

Ulteriur Grischun Il cumbat per il sez da Doris Caviezel-Hidber ha cumenzà

La PS da la citad da Cuira vul defender il sez da Doris Caviezel-Hidber cun ses candidat Patrik Degiacomi. Las partidas burgaisas pudessan impedir ina l'autra sco gia l'ultima giada. Cun il candidat Marco Tscholl da la PBD ha ina da las partidas burgaisas lantschà ses cumbat electoral.

La PS Cuira vul defender il sez da Doris Caviezel-Hidber en il cussegl da la citad da Cuira. Ella ha tramess Patrik Degiacomi en il cumbat. Dentant er ils burgais da la citad avessan gugent ina plazza en la regenza da la citad. L'emprim cuntracandidat da Degiacomi è Marco Tscholl da la PBD. Dentant sco quai che Beath Nay, president da la PPS Cuira conferma, vegnia er la PPS anc a proponer in candidat.

Nagin candidat communabel dals burgais

audio
Bunura: Nagin candidat singul PBD per il cussegl da citad Curia
ord Actualitad dals 09.01.2016.
laschar ir. Durada: 3 minutas 28 Secundas.

Ina situaziun sumeglianta sco tar las elecziuns da la citad avant 4 onns. Alura aveva quai dà uschè blers candidats burgais che concurrenzavan in l'auter, uschia che la PS ha la fin finala profità. I fiss bain meglier da cumbatter cun in sulet candidat per tuttas trais partidas burgaisas, dentant chattar in saja grev e mintga partida veglia trametter lur meglier chaval en la cursa, dian ils presidents da la PLD e PPS. Uschè ch'i na vegn er quest onn betg a dar ina collavuraziun tranter las partidas burgaisas.

La PS perencunter na tema betg la concurrenza, ella saja la pli ferma partida a Cuira e vegnia a defender ses sez, ha ditg Angela Buxhofer, presidenta da la PS Cuira. Ad ella plaschess quai pia, sche las partidas burgaisas concurrenzassan er quella giada ina l'autra.

La PLD na vegn betg a proponer anc in segund candidat sper il president da la citad Urs Marti. La finamira da la partida è numnadamain cunzunt, che Marti vegnia reelegì. Tge che la PCD fa, è anc betg cler. Ella na infurmescha anc betg sur da la strategia avant ch'ella n'ha betg gì la radunanza da commembers.

RR Actualitad bunura 06:00

Artitgels legids il pli savens