La surfatscha dal glatsch traglischa e vegn anc nettegiada da la maschina da glatsch, nagin ha anc laschà enavos fastizs. E quai resta era uschia, in lung mument. Avrir in lavurdi n’è forza betg la meglra idea. Els vulevan anc controllar che las lingias na perdian betg chemicalias, di Markus Giger, manader da las plazzas da sport da Cuira. Perquai hajan els stuschà l’avertura sin in glindesdi.
In’entschatta pli ruassaivla è normal
La blera glieud vegnia la mesemna suentermezdi, cura che las scolas han liber, las fins d’emna e dis da bell’aura. Ed enfin uss na saja la glieud forza betg en tempra d’enviern. Inquietads pervi da l’entschatta ruassaivla n’è nagin.
La glieud arriva
Suenter gentar hai tuttina in pèr persunas sin il glatsch. In giuven che dat hockey ed è sa legrà l’entira stad sin quest mument ed in bab cun ses mattet. I saja schon tempra d’enviern, cun la naiv uschè datiers. Ed ina dunna ch'accumpogna dus giuvens da la Siria sin il glatsch agiunta, ch’i saja fraid. La pauca glieud na disturba nagin. Anzi, uschia hajan ins dapli plaz ed il glatsch na vegnia betg uschè spert tschuf. Mo il giugader da hockey sa legrass sin in pèr cumpogns per giugar in gieu.
RR actualitad 17:00