«Il Grischun è politicamain il pli datiers a mai»

Magdalena Martullo-Blocher, la scheffa dal concern d’industria EMS Chemie, candidescha proxim atun per las elecziuns en il Cussegl naziunal - quai per la PPS dal Grischun.

Martullo-Blocher ch’ha 45 onns duai timunar ina da las duas glistas da la Partida populara svizra dal Grischun, ha la partida communitgà oz. La segunda glista da la PPS vegn timunada dal Cusseglier naziunal, Heinz Brand. La nominaziun dals candidats sto dentant anc vegnir approvada dals delegads da la PPS grischuna.

Sco scheffa ed acziunaria da maioritads da la pli gronda interpresa en il Grischun, enconuschia ella fitg bain la situaziun e las sfidas da la plazza economica Grischun.

La PPS è cuntenta ch’ina «manadra d’economia cumprovada» sa mettia a disposiziun per las elecziuns federalas.

«  Sent en mes mintgadi da manar la EMS Chemie il svilup sbaglià da la politica. »

Magdalena Martullo-Blocher
Candidata da la PPS Grischun

Il svilup sbaglià da la politica sco raschun

La raschun daco ch’ella ha prendì la decisiun da candidar per il Cussegl naziunal è tenor Magdalena Martullo-Blocher ch’ella sentia en ses mintgadi da manar la EMS Chemie il svilup sbaglià da la politica e las consequenzas da quel sin il chantun, las vischnancas e cunzunt er sin interpresas e burgais e vischins.

I vegnia prendì davent adina dapli cumpetenzas a chantuns e burgais e la centralisaziun prendia tiers a moda rasanta. Grad chantuns a l’ur hajan grev da vegnir udids da la politica a Berna. Ella lessi far lavur da scleriment e represchentar ils interess dals Grischuns pli fitg a Berna.

Sursiglir cuntegn supplementar

Ils candidats da la PPS

Glista B da la PPS grischuna:

  • Cusseglier naziunal Heinz Brand da Claustra
  • Valerie Favre Accola da Tavau
  • deputà Jan Koch dad Igis
  • Livio Zanolari dal Puschlav e Cuira
  • Rico Rieder da Maiavilla

Glista M da la PPS grischuna:

  • Magdalena Martullo-Blocher
  • Beath Nay da Cuira
  • Mario Cortesi dal Puschlav e Cuira
  • Martin Candrian da Flem
  • Renatus Casutt da Falera

Martullo-Blocher resta a Turitg

Malgrà che Magdalena Martullo-Blocher na stat betg en il Grischun, sa senta ella fitg colliada entras sia lavur sco scheffa da la EMS Chemie ch’è il pli grond patrun da lavur privat en il chantun. Sper quai saja il Grischun politicamain il pli datiers ad ella. Dapi il december posseda ella er ina chasa da vacanzas a Lai ed è sco ella di, uss anc pli savens en il Grischun che avant. Ina midada dal lieu da domicil vegn dentant betg en dumonda per ella. Ella vegnia vinavant a restar a Turitg.

Ina surpraisa per Pult

Jon Pult, il president da la PS grischuna è stà surprais che Magdalena Martullo-Blocher candidescha per il Cussegl naziunal per il Grischun, cunquai ch’ella na abiteschia betg en il Grischun. «Politicamain èsi dentant fitg interessant», uschia Pult.

Elecziuns na vegnan betg pli simplas

Bruno Claus, il president da la PLD GR è cuntent che finalmain era la PPS haja ina ferma glista. E per Andreas Felix, il president da la PBD GR, èsi cler che cun la candidatura da che Magdalena Martullo-Blocher na vegnian las elecziuns betg pli simplas per sia partida.

Glista che represchenta l’entir chantun

Marcus Caduff, il president da la PCD GR prenda per enconuschientscha la candidatura da Martullo-Blocher ed accentuescha: «Nus da la PCD essan en la fitg favuraivla posiziun che nus avain atgna glieud, fitg qualifitgada, che nus pudain metter sin la gista per il Cussegl naziunal che represchenta l’entir chantun grischun e betg mo ina singula interpresa.»