Siglir tar il cuntegn
Inhalt

Ulteriur Grischun Il success da la Gruppa Ems cuntinuescha

En l’emprima mesadad dal 2016 ella fatg 3,7% dapli svieuta netta ed ha augmentà il resultat da la gestiun per 16,6%. Quai en congual cun la perioda da l’onn passà. La Gruppa Ems ha communitgà questa bun’ura.

Martullao cun fatscha rientada.
Legenda: la Gruppa Ems da l'inteprendidra e cussegliera naziunala Magdalena Martullo crescha ad in crescher. Keystone

Cun 3,7% ha la Gruppa Ems augmentà sia svieuta netta consolidada da 966 sin 1’002 milliuns francs. La Ems scriva, ch’ella haja cuntanschì quel resultat grazia a ses affar innovativ cun spezialitads.

Cun quai ha la Gruppa Ems er pudì augmentar ses resultat da gestiun: Quel è creschì da 226 sin 264 milliuns francs per l’emprim mez onn 2016. Era qua saja il creschament marcant tar ils products spezialisads cun lur auta marscha central. Da l’autra vart na sajan ils custs creschì per tant sco annunzià.

Pervi da quest svilup vul augmentar il cussegl administrativ la dividenda per 1.50 francs per aczia sin 15 francs. La radunanza generala da la Gruppa Ems vegn ad esser ils 13 dad avust.

Martullo resta en emprima lingia scheffa

Dapi il december è Magdalena Martullo betg mo scheffa da la Ems Chemia mabain er cussegliera naziunala per il Grischun. Sis sessiuns èn passadas dapi lura e cler, quai dettia schon lavur da dumagnar tut sut ina chapitscha.

Ils pleds clav da Magdalena Martullo èn multitasking ed organisaziun. Ella lavuri savens er per la Ems davent da Berna ed il cuntrari. Quai giaja bain e cun anc in zic dapli experientscha giaja quai lura anc meglier en il futur.

Tge che Magdalena Martullo punctuescha dentant è ch’ella vegni en scadin cas er en il futur en emprima lingia ad esser scheffa da la Ems e betg politicra. Perquai n’haja ella er naginas ambiziuns da far carriera politica. Dentant ch’ella n’haja naginas ambiziuns politicas insumma veva ella er gia detg curt avant ch’ella ha lura candidà per il Cussegl naziunal.

RR novitads 07:30