La finamira saja da mantegnair la ierta culturala dals Gualsers. Quai saja mo pussaivel sch’ils Gualsers s’uneschian sur ils cunfins ora, di Richard Lehner, president da l’uniun internaziunala da Gualsers.
Far festa e s’inscuntrar cun amis
Ils participants da la Svizra, da l’Italia, dal Principadi dal Liechtenstein lessan far festa, s’inscuntrar cun buns amis e mantegnair la cultura gualsra. Quai saja sur tut il linguatg, l’architectura e la tradiziun religiusa.
La proxima generaziun è da la partida
Per ch’il linguatg na giaja betg en emblidanza èsi impurtant ch’era ils giuvens e las giuvnas sa participeschan a talas sentupadas. Per ch’els possian mantegnair las tradiziuns.
Ils pli gronds fans
Fieu e flomma per il til dals Gualsers è ina famiglia da la California en ils Stadis Unids da l’America. Els charezzian la musica, ils costums, ils uffants che surprendian las tradiziuns. Dal spectacul fa la famiglia ina massa fotografias per lura metter quellas sin facebook e parter las impressiun cun lur amis en la patria.